عيد وعيديه ولكن

تستقبل الامه الاسلامية اليوم عيد الاضحى المبارك عيد الحجاج خاصة والناس عامة ،مظاهر الاحتفال بالعيد تختلف من بلد الى بلد باختلاف ثقافات البلدان وعاداتهم

في الكويت يحتفل الناس بالعيد بالزيارات العائلية من اول صباح العيد ،واقامة وجبة الغداء في بيت كبير العائله وغالبا مايكون بيت الجد فتجتمع الاسره ويبارك الافراد فيها لبعضهم البعض،ويجتمعون على الغداء ثم يجلسون الرجال بدوانية المنزل والنساء ايضا في مجلس لهم او جميعهم مع بعضهم البعض حسب عادات كل عائلة حيث يتكلمون ويضحكون ويقضون وقتا ممتع

وهنا تظهر العيادي شوفوووها شكثرها لفئة الأولاد والأحفاد في العائلة وهم الطبقه اللي تفسفس بالحلال أي الفلوس الي شخصيا انا انتمي منها، يأخذونها من فئة الكبار بالعائلة وهم الطبقة الرأس مالية،حيث يعم الفرح ويبدأ الشباب في حسابها والتخطيط الأمثل لصرف العيدية مع الكثير من الفرح والمرح، وفي المساء يخرجون لقضاء سهرتهم في مطعم أو سينما أو مسرح أو زيارة بعض الاقارب والاصدقاء، ولو انني لا احب هذة الالتزامات العائلية مع انني رجل اجتماعي احب الاختلاط مع الناس لانه الحشره مع الناس بروحها عيد ولكنني لا احبه داخل الاطار العائلي لعله يحسسني اني مقيد ليش وشمعنى؟ ما أدري

تطبق الايام شهرها الرابع علي في هذه اللحظات،أربعة اشهر وانا بعيد عنك ياوطني،اليوم بالذات احسست بغربة قاتله وانا لا احظر العيد في وطني،فلو لو اكن احظر تجمع العائلة في منزل جدي أقلها كان هناك الاحساس،نعم الاحساس بوجودها واهتمامها ،ورؤية اسرتي من ابي وامي واخوتي في المنزل ومشاركتهم الافطار و الابتسامه صباح العيد كان كافيا بالنسبة لي

نعم أفتقدكم اليوم اكثر من كل يوم مضى علي هنا،افتقد ابتسامة والدتي ومباركتها لي بالعيد وتعليقاتها على كل شي يظهر بالتلفاز صباحا، وعلى صراخ ابي على اخوتي للذهاب الى الشعب واللحاق "عاليمعه والغدا" وعلى ضحك وامناجر اخواني المضحك الدائم

وكما قال الشاعر بدر شعيل وهو شاعرمرموق له مكانه شعريه كبيره :العيد باجر قلت انا العيد مابيه..العيد مو للي مفارق زمانه، صح السانك يابوشعيل واسمحلي اضيف كلمه على قصيدتك واقول: العيد مو للي مفارق أوطانه ،هالمره صج ما كنت أفكر ولا أبي عيديه، هالمره صج عيديتي اهي الرده حق ديرتي

عيدكم مبارك من كل روحي وقلبي الي دايما معاكم وصورتكم بالبال ماتروح وين ما أنا أروح
افتقدك يا وطني بكل مافيك من مناطق وجسور وطرق وبحر وبكل ايجابياتك وسلبياتك تبقى الافضل ياوطني ويبقى لك الشوق الدائم..راح الكثير يا بلادي ومابقى الا قليل

عيدكم مبارك جميعا وحج مبرور وذنب مغفور حق اخواني الحجاج