أبعتذر

ولو اني أميل للسياسة عند الكتابة لكن دام احنا في اخر ايام السنه وبالتحديد الحين بالساعات الاخيره بعد،والسياسة خاشها لكم حق السنه اليايه على خير..وبدل لانقوول هابي نيو يير وبس ليش مانعمل فيها بتقولولي شلون انا أقولكم ، نخلي يامصحوبين السلامة النيو يير فعل مو بس حجي ونخلي هالنيو يير.. يير الدعوة التسامح

كل واحد فينا اكيد ولا يقول لا والا ماصار اكيد صار خلال سنه كامله تهاوش مع احد، اختلف مع احد براي والنتيجة مشاكل او حزازياات او شعور ان مالك خلق تطل بويه اللي تناقشت معاه وقثك تحسه أثول! صج نصادف ناس وايد جذي ويخليك تقول بقلبك حسافة الحجي فيك أوأو أو وايد عندنا بهالسوالف بالذات، ودايمأ الحق يصير معانا شلون مادري بس انا تصير معاي،انا اقول اللي عنده احد متهاوش معاه وخاطره يدش صج بسنه يديده سنه مايمسح فيها رقم ويضيف رقم لأ،سنه يديده تغير بحياته وتضيفلها من اول يوم فيها انجازات ماتنسي وتفتخر فيها بعدين مثل العقار لايخلي احد شايل بخاطره عليه وتصير صج سنه يديده اذا كلفت نفسك "ولو انها ثقيله عالقلب بالبداية" بس جرب بعدها صج ترتاح ودق على انسان تهاوشت معاه اواختلفتوا من يومها... انشالله تدق حتى من بيتهم لاتتعذر برصيد واعتذر حتى لو ماكنت غلطان ياخي، ترى الكبير مو بالزعل.. الكبير اللي يقدر يعتذ ويقول أنا اسف لأن كلمة اسف هالكلمه اللي من ثلاث احرف تحسها سهله وايد لكنها وايد صعبه وقت اللزوم جرب وشوف.. والعفو عند المقدرة من شيمة اصحاب القدر الرفيع حاول وماتخسر شي أقلها لو تتحسف هم بتاخذ أجر عاللي سويته شوف ربك شكثر رحيم

ليش ندش سنه يديده واحنا مو يدد فيها؟ هذي دعوه للجميع دعوه للتسامح مهما كان الغلط، ترى الايام تركض وكله من اعمارنا، مايسوى الزعل والله لا من قريب ولا من بعيد وأنا أولكم بأعتذر

انا اسف لكل شخص سواء كان طفل او انسان بالغ، امرأة كانت أم رجل غلطت بحقه حتى او حتى اختلفنا بشي وترك الاختلاف أثر سلبي في نفوسنا، حتى لو يومها ماقصدت، دام انه حزة بخاطراللي جدامي فأنا اسف وياريت تسامحوني

لأنه الحياة ماتسوى لحظه تمر من غير أهل او ربع، واحد زعل يوم وواحد بيزعل باجر، هني بخسر وايد اهل ووايد ربع، وكلنا نغلط واذا ربنا يسامح ودينا دين التاسمح والرحمة ...أكرر اعتذاري يا أصدقائي

أذكر قصيدة حق مهندس الكلمة الشاعر الأمير بدر بن عبدالمحسن وتفنى بها فنان العرب وانشالله يمديكم تعتذرون وماتوصلون للي وصله الشاعر بالقصيدة واهي بعنوان.. إلا الهوى

أبعتذر ... عن كل شيء
إلا الهوى .. ما للهوى عندي عذر
أبعتذر .. عن أي شي
إلا الجراح .. ما للجراح إلا الصبر
إن ضايقك اني على بابك أمرّ
ليلة ألم ... واني على دربك مشيت عمري وأنا
قلبي القدم
أبعتذر ... أبعتذر ... كلي ندم
عن كل شيء ... إلا الهوى
ما للهوى عندي عذر
ا تصدقي ... ما اخترت أنا أحبك
ما احدٍ يحب اللي يبي
سكنتي جروحي غصب
ياحبي المرّ ... العذب
ليت الهوى وانتي ... كذب
كان اعتذر لك عن هواي
ما أقول أنا ... كوني معاي
ان ضايقك اني على بابك أمرّ
ليلة ألم
واني على دربك مشيت عمري وأنا
قلبي القدم
أبعتذر ... أبعتذر ... كلي ندم
عن كل شيء ... إلا الهوى
ما للهوى عندي عذر
الله كريم .. حبك ... يكون
همي القديم
وجرحي القديم
والله عليم ... يا أحلى العيون
ان الفراق ... جزا الفراق
أبوعدك ... كان الطريق بيبعدك
بامشي الطريق
وكان الجحود بيسعدك
مالي رفيق
أبجمع أوراق السنين ... وأودعك
كان الفراق اللي تبين ... الله معك