أين الثرى من الثرية؟

أيام انتخابات

امس دخلت الجابرية وشفت زحمه لها اول مالها تالي ، المشكله ان المقرات الانتاخبيه اللي مريت عليها بطريجي فاضيه مادري وين هالناس قاعد تحوس وبالصدفة لقيت واحد من الشباب عند بقالة صاحبنا علي اللي يم ثانويتنا الجابرية سابقا - فهد الدويري - حاليا فسألته شسالفه الناس زايده قالي الناس قاعد تحوس ورا اللي يشروون الاصوات واللي ينزل عشا! العشا قوول ديرة خير ماكو احد ينام يوعان بس المشكلة في شراء الاصوات او شراء الذمم بمعنى أصح .. والله عيب شخلينا حق غيرنا

يعني لو نفترض مثلا ان المرشح شرا صوتك بألفين دينار على اساس توصله كرسي البرلمان اللي طبعا يتميز بكثير من الامتيازات منها الحصانة الدبلوماسية والواجهه الاجتماعية والمكانه الراقية وابواب تدخل فلوس من كل صوب سواء من لجان المجلس او السفر وتمثيل البلد بالوفود او القروض المفتوحه من غير فوايد او كرسي الوزاره واللي تحت كرسي الوزاره و و ..الخ

هذا بفرضية انك بعت صوتك له بالفين مقابل اربع سنوات بكل هالمميزات انزين مافكرت جم تسوى ذمتك؟ الفين بالسنه يعني شهريتك تقريبا من الالفين 160 دينار يعني يوميتك اربع او خمس دنانير على سنه هذا؟ ترى السنتين نص القيمه يعني خلال اربع سنوات النائب الفاضل شرا ذمتك بربع دينار باليوم! تصدق

انا ماتكلم عن دائرة معينه انا اتكلم عن مأساة موجوده بأغلب الدوائر وهي شراء الأصوات، وهم انا ماتكلم عن رجل او امراه مسؤول عن اسره و "كاسره ظهرهم" الديون او مرضى او اي من الظروف القاهره او يمكن الجهل اللي حدهم يوصلون هالحاله ويبيعون اصواتهم

انا اتكلم عن شباب وشابات من جيلي اللي قاعد تغرهم هالأشياء وصاروا يركضون وراها ويسعون لها، يقولك صيف بسافر او باخذلي سيكل و لاب توب وموبايل، ترضون يكون لكم سعر؟ وسعر جدا زهيد، تقبل انك تنشرا بربع دينار باليوم؟ هذا وباجماع الكل ان حرام

مع فرضية انك ماتخاف الله وماعندك لا مذهب ولا دين، انزين ماتشتري ماي ويهك وتقول عيب انا ولد عايله مابيع صوتي؟
والمشكله الاكبر ان واحد قاعد يشجع الثاني الغلط ومفتخر متشقق انا بايع صوتي لفلان

جنه عمل بطولي! صج اذا لم تستحي افعل ما شئت

وينكم ووين الشباب والشابات اللي راحو ونامو بعد عند مجلس الامه واصرخوا باعلي صوتهم

لااااااااا للفساد

ولا لثالي الفساد

ونعم لأول الاصلاح

نبيـــــــــــــــــــــها خمـــــــــــــــــــــس

هذا الشعار البرتقالي الشبابي اللي هز مجلس الامه وزلزل الحكومه

هذا الشعار اللي خله العالم كله ينظر لشباب الكويت

هذا الشعار اللي جمع 29 نائب من مختلف التيارات والتوجهات الى هدف واحد

الاصلاح من اجل الكويت

وكلمة واحدة هي

نبيــــــــــــها خمــــــــــــــس

هؤلاء الشباب والشابات هم الذين فعلا اتشرف بانهم من ابناء جيلي هم اول من دعى الى الاصلاح
وهم عمود البلد ورمز الوفاء للوطن

ليش ماتكون معاهم مكمل لعملهم بعيدا عن كل انواع المغريات البسيطه الوقتيه اللي ماتدوم

لا ترقى الدول و الامم الا بسواعد ابنائها من الشباب

اقول في اخر كلامي

الى كل بائع صوت

راجع نفسك لازال الوقت امامك في اختيار الاصلح

انت اغلى من المال

والكويت اغلى من كل شيء

كلمة حق

ربما كل الاحداث الحالية وانشغالي كما انشغال الجميع بها أنساني الكتابة في مدونتي الصغيرة،هنا اتذكراخواني واخواتي واشكرهم على المتابعه والسؤال الدام ، مهما طال غيابي لكني لا استطيع اعتزال هالمدونه لأسباب وجيهه وهي الفضول والتحلطم والتعليق .. مشكوريـــــــــــــــــــن ماقصرتوا وسامحوني مره عاشره هالقصور